KISA CHA MBUZI NA MCHUNGAJI

Mchunga Mbuzi alihangaika kumrudisha Mbuzi mmoja aliyetoka kundini na kuingia kwenye shamba la jirani. Alipiga mbinja na kupuliza baragumu bila ya mafanikio; yule Mbuzi alimbeza na kuidharau miito yote. Mwishowe Mchunga Mbuzi aliudhika na kumrushia jiwe kwa nguvu, likamvunja pembe moja.

Kuona vile Mchunga Mbuzi alipagawa kwa huruma na hofu. Alimbembeleza yule Mbuzi kwamba watakaporejea nyumbani asimdondolee bwana mwenye mbuzi kilichosibu. Mbuzi akamjibu, “Kivipi ewe Mchunga mpumbavu, hujui kuwa hata nikifunga mdomo wangu, pembe yenyewe itaongea!”